Уладзімір Мінавіч Мазго

Пісьменнік нарадзіўся 5 сакавіка 1959 года ў гарадскім пасёлку Зэльва Гродзенскай вобласці. У 1964 -1968 гадах жыў з бацькамі ў Кемераўскай вобласці. Там хлопчык пайшоў у школы. Калі Уладзімір скончыў 2 класы, сям’я вярнулася ў Беларусь. Бацька купіў хату ў вёсцы Бярэжкі. Школа ў вёсцы была беларускамоўная, і Уладзімір, які пачаў вучыцца ў Сібіры і добра не ведаў беларускай мовы, бацькі аддалі ў Зэльвенскую рускамоўную школу. З 1979 года па 1981год служыў у Савецкай Арміі.  У 1985 годзе завочна скончыў філалагічны факультэт Беларускага дзяржаўнага ўніверсітэта.

Творчая біяграфія паэта пачалася ў 1972 г. Ужо ў 6-м класе ён пачаў пісаць вершы. Адзін з іх у 1972 г. быў надрукаваны ў газеце "Піянер Беларусі”, другі - у часопісе "Бярозка”. З таго часу Уладзімір стаў юнкорам газеты "Піянер Беларусі”, дасылаў у яе рэдакцыю вершы і нарысы.

Першая  кніга Ул. Мазго "Пад спеў крыніц” выйшла з друку ў 1982 г. У 1989 годзе ўбачыў свет і першы зборнік вершаў для дзяцей "Калі спрачаюцца маланкі”, потым з’явіліся наступныя дзіцячыя кнігі: "Суседзі па сусвеце”(1994), "Смехапад”(1999),”Прыгоды марахода”(2002). Уладзімір Мінавіч быў карэспандэнтам газеты "Інтэграл”, супрацоўнікам літаратурна-драматычных праграм беларускага тэлебачання, працяглы час працаваў рэдактарам выдавецтваў "Юнацтва”, "Мастацкая літаратура”. Працаваў у дзіцячым часопісе "Вясёлка”, які быў і застаецца настольнай кнігай для многіх пакаленняў беларускіх дзяцей.

Асобныя творы Уладзіміра Мінавіча перакладзены на рускую, англійскую, таджыкскую, чувашскую і іншыя мовы.

Член Саюза пісьменнікаў Беларусі (з 1984)

Лаўрэат прэміі Федэрацыі прафсаюзаў Беларусі ў галіне літаратуры (2005)

Лаўрэат літаратурнай прэміі імя Васіля Віткі (2005)

Выдатнік друку Беларусі (2007)

Лаўрэат Рэспубліканскага конкурсу «Лепшы твор 2007 года» у галіне песеннага жанру

Лаўрэат літаратурнай прэміі Залаты купідон (2008)

Ганаровы грамадзянін Зэльвенскага раёна (2008)

Медаль Францыска Скарыны (2016)

Пераможца конкурсу на лепшы літаратурны, мастацкі і музычны твор, прысвечаны 100-годдзю пагранічнай службы Рэспублікі Беларусь, у намінацыі «Лепшая песня аб пагранічнай службе» (2018)

Ганаровы член Саюза пісьменнікаў Беларусі (2019)